قیسا شعرلر(۲۴)
فریبا مرتضایی
(۱)
آشکارلار آجی،
گیزلین‌لر شیرین اولور؛
سن
گلینجه گیزلینجه
آغزیمین دادی ده‌ییشیر؛
آدین دیلیمین اوجوندا شیرینلشیر.
(۲)
وشاقلیغیمدا
بیله‌ییمین اوستونو دیشلردیم
پوز وئرم بیر ساعات اوچون،
جانیم هئچ اینجیمزدی؛
بو گونلر
باشیمی آپاران،
بیله‌ییمی قوپاران،
جانیمی آجیدان،
عؤمرومو فیرلادیب
اؤلومون اته‌یینه آتان زاماندیر.
(۳)
کیپریک‌لریم یاناغیمی دئشیر،
سالخیم -سالخیم آغلاییرام؛
گئت دئمیشم!،
نئیله‌ییم،
نئیله‌ییم سنسیز گولوم؟!
چییین‌لرین ده کی یوخ؛
داشیر
گئدیر بوش یئره !
(۴)
گؤزلریمین پرده‌سی
باشینداکی یایلیقدان‌دیر؛
ساچینین بیر تئلینیه باخماق اوچون
ایپک یولون توتموشام.
(۵)
سول بیله‌ییمی کسیب
گؤزلریمین پرده‌سین
انتظار چکن یول‌لارینا تیکه‌جه‌یم؛
آی نه گؤزه‌ل!
اؤزوم اؤلچوب
اؤزوم بیچه‌جه‌یم
زامان سیز، حئسابسیز
سئوه‌جه‌یم
بیر ساعات نه‌دیر کی… !
(۶)
اه‌یلش یانیمدا
ایکی ایستکان چای ایچک،
قونوشاق!
چایدانین
آلتین سؤندور!،
منیم اوره‌ییم
ایستی‌دیر.
(۷)
آی منیم اوشاقلیغیم
هایاندا قالمیسان؟!
آغ گونلریم
ساچیما دوشوب،
قاراسی
بخت آیناما؛
باخیب باخیب آغلامیشام؛
دیزلریم گلمیر سَنه
سَن گَل بیزه
باشینا دؤنوم
داریخمیشام!
