یوخلوغوموزدا یانماق ! ….
علی حسن اوغلو
«مرضیه احمدی اسکوئی‌»نین خاطیره‌سینه

بیر دئییل کی،– میلیون اوره‌ک –
میلیونلاردا یاشاییرسان؛
میلیون – میلیون آرزولاری اؤز آدینلا داشییرسان!.
بیزیم آنا  وطنیمیز سنین آنا آدیندادیر؛
آنالارین ظولمه قارشی،
حاقسیزلیغا،
بوغونتویا،
کؤله‌لیگه چیخیش اولان حاق – هارایی،
سسینده، فریادیندادیر؛
بیزیم آنا وطنیمیز سنین آنا آدیندادیر.

یوردوموزون گؤزه‌ل قیزی مرضیه جان!
یاشادیقجا آذربایجان،
بؤیوک ایران؛
یاشادیقجا …
–           بئله دئییم –
قارانقولوق بیر فضانین اوره یینده اود قورشاغی،
او – کهکشان،
یاشایارسان زامان – زامان.
دامارلاردا غیرت سویو،
کیشیلیگین خولقو – خویو،
قیزیل رنگلی آخدیقجا قان،
یاشایارسان مرضیه‌جان
مرضیه‌جان!

خیردا – اینجه بیر آرخ کیمی زینه – زینه،
میلیونلارین حیات آدلی دنیزینه-
آخیرسان سن.
فیکیرلرین سماسیندا،
اوره‌کلرین ماوی – ماوی گؤیلرینده-
شاخیرسان سن.
سن –
ایلدیریم حیکمتلی‌سن؛
شاخان کیمین،
میلیونلارین گؤزلرینده اود پایلادین .
گله‌جگی،
یاشاماقچین،
حیات اوچون،
یئنی‌لیگه،
«وارلیغیمیز چالیشماق‌دیر» دئیه – دئیه
سن هایلادین.
«یوخلوغوموز دایانماق‌دیر، دایانمایین، آخین!»
دئدین نسیللره.
ایللر کئچدی،
میلیون – میلیون انسانلاری اوردوموزا چکدین بیزیم.
قلبیمیزده دوستلوق آدین،
صلح سئورلیک ایدیالارین اکدین بیزیم.
گله‌جگین  موشتولوغون
اؤز قانینلا پایلادین سن بو ائللره؛
«دایانمایین، آخین!» دئدین نسیللره.

سن «نوبار»ین  حیاتیندان
وارلیغینین معناسینی نوبار ائتدین.
اوره‌گینده دوشونجه‌لر دالغاسیندان نوبارلاندین.
سن «نوبار»ین قیش عؤمرونو،
چیچک – چیچک دالغالانان دوشونجنله باهار ائتدین.
سن یاشاتدین
نیسگیل بویلو مین حسرتلی دالغالاری
اوره‌گینین دنیزینده.
سن حیاتا،
اومید – اومید گولدون آنجاق؛
گزنمه‌دی قارانلیغین آفت قوردو
دیشلرینین صاف ریزینده!…

گله‌جگی یاشاماقچین،
حیات اوچون،
یئنی‌لیگه،
«وارلیغیمیز چالیشماق‌دیر» دئیه – دئیه
هارایلادین مرضیه‌جان!
اوره‌گیمیزه اود پایلادین مرضیه جان!
میلیون – میلیون انسانلاری اوردوموزا چکدین بیزیم؛
قلبیمیزده دوستلوق آدین،
صلح سئورلیک ایدیالارین اکدین بیزیم.
«دایانمایین، آخین!» دئدین نسیللره؛
گله‌جگین  موشتولوغون
اؤز قانینلا پایلادین سن بو ائللره.

۲۰/۰۳/۱۳۷۰