ایکی شعر
هادی قاراچای
۱٫ گؤرونتو
دنیز دالغالاری‌یلا
آغاج یارپاقلاری‌یلا دانیشیر
من
دیلیمی آغزیمین بوشلوغونا سرمیشم دینجلسین
یالان بازارینا قیز بوراخمیرام.
بو آن قوم دیلینده
بارماقلاریملا دانیشیرام
باخ
اووجومدان سوزولن قومدا سنین آدین وار.
۲٫ گؤزلرین
قاپیلار آچیلاجاق
قاپیلار آچیلاجاق
قاپی باشی بیر مندیل آچیلاجاق گونشدن
اومودو اومسونانلارلا
سئوگینی سئونلرله بؤلوشه‌جه‌ییک
زوغال آغاجلاری قیپ- قیرمیزی
گیله‌نارلار یئتگین
یوسون قوخوسو
آراز
دوم- دورو
و اوچان بوتون قوشلارین قانادیندا سنین آدین
سؤیله
هانسی دنیزده یویونموش سنین گؤزلرین بونجا یاشیل ؟!
