من ایرمی‌بئشینجی کؤرپه‌یم و آتمیش بیرینجی تانری
کامیل قهرمان‌اوغلو
من ایرمی بئشینجی کؤرپه‌یم و آتمیش بیرینجی تانری
جان آتیر منی آتیملار
قانی شیلله‌له‌ییر اوزومه
آینالاری گؤوردیر گؤزومه
یاغلوچا رؤیالاری
قیرقی باخیشیندا باریت یوخولاری
کئفیم اولسون باشینا گئدیرم من
باشینا گئدیرم ساچلار شهیدلیینی
قان قیشقیرتیسینی گئدیرم
آه… چیغیرتیسینی
نه گلسه باشیما گئده‌جم فاشیست یوللاری
استفراق ایچه‌جم یوللاردان
اؤلو اتی ییه‌جم
و ایچه‌جم دوغوز سودویونو
آنجاق باشینا گئده‌جم
باشینا گئتمه‌دن سورویه‌جم داغلاری اؤزومله
قارینیما داش باغلایاجام
اللریمه بولود
هرنه‌یی جانیما آلمیشام
هر آددیما باشیمی گوتورموشم یوللاردان
هر قاریشا آیاغیمی
سیلکینیر اؤزونو یوللار
تیتره‌شیر داغلار
قایالارین قالین دریلرینی اینجه‌لشیرم
باغیرلاریندا بولاغلارین آتار دامارینی توتموشام
دوداقلاریندا بایقوش کولکلری
آخی کیمه نه؟
کیمه نه باشینا گئدیرم من
باشیمی بیشیریب یئییرم
اللریمی کسیرم
اؤزومو آتیرام ایته
باشینا گئتمه‌دن یویورور جینازه‌می قایالار
دلی دالغالار
آسیر منی قولاغینا سیرغالار
گولور قاسیرغالار
قاچیر باغالار
چیرپینیر لئشیمی پوئیزیالار
زارییر آغریمی نووافنلر
قوسور بتادنلر منی
هه!
من بئله‌یم
بئله‌لیکله تام بئله‌لری بئلیمده بئلله‌ییرم
بئلی سینمیش بئله‌یم هئییییی …
گؤزو چیخمیش دیله‌یم
مجنون کلمه‌لری داریخیرام سطیرلره
باشینا قالمیش شعیرلریمی
من کولک پادشاهییام
بالاسالمیش یارپیزلار آناسی
خزل ایمپئراتورویام من
نئیسان یئللر گره‌یییه‌م
یاریم یایلاقلار اوره‌یی
یاغیش دوشور باغریما آه …
دوغوز بیتیر منده
آنجاق
هار قوردلار آجیغییام من
یارالی دوه‌لر اوفولتوسو
من باشیما گئتمه‌دن،گئدیر منی اعصابلار
گئدیر نهنگ آغریلار
شکیللر آغریسیام من
رسیملر دردی
اسیملرین بورون قانییام من
سازاقلارین بوغاز دویونو
هارا گئدیم من آخی باشیما گئتمه‌دن
تام هارالار هاراسیام
تام یارالار یاراسی
من یارالار ایچیملییم
ایچین مندن
کئچین مندن
من باشینا گئدیرم …
۲۹/۰۷/۱۳۹۲
یک پاسخ
سلام حؤرمتلی کامل قهرمان اوغلو جنابلاری شئعیرینیزی اوخودوغومدا فایدالاندیم. وار اولون عزیز.