ایکی شعر
هادی قاراچای
۱( باییر
یئتر به یئتر،
چکیلیب
چکیلیب
سون تورپاغیمیزدیر- دئیه
اوووجلاریمیزا قیسیلدیغیمیز.
یئتر به یئتر
اوووجلاریمیزدا
اوجاق قوردوغوموز
و چیلپاق اوشاقلاریمیزا
اوره‌کلریمیزین یاراسیندا یووا تیکدیگیمیز.
ائهئئئی…
سورگوندن سورگونه اوچان دورنالار!
اوسانمادینیزمی اؤلمکدن و دیریلمکدن
اوسانمادینیزمی وطنسیز یاشاماقدان؟
و سسسیزجه‌سینه اوچدولار
قانادلاری بئش دورنالار.
آشدیلار
قارلی داغلاری
دومانلی آشیریملاری.
نه قوبوستان داشلاریندا دونموش ایلخی‌دان بیر آت کیشنرتیسی
نه چنلی‌بئل داغلاریندا
قیلینجلا قالخانین گؤروشمه سسی…
سسسیزلیک
سونونجو سسدیر بوردا،
و یوردون بوی‌هابویونجا
اوزاندیقجا اوزون
یاییلدیقجا یایقین‌دیر
تورپاغی قوجموش مزار داش‌لاری.
۲( آند
بیلیرم
اوچسام گؤیلره
سیندیرار قانادلاریمی تانرینین ملئیکه‌لری.
و گیرسم تورپاق آلتینا
چئینه‌یر سوموکلریمی تورپاغین کور سیچان‌لاری.
من، سیزینله یاشاماغا مجبورام
هئی سیزینله…
قیزلارینیز گؤزلرینی قاماشدیریر گونشین
و چیلیسلیگینیز آجیندان اؤلدورور قارداشلاریمی.
الیم الینیزی سیخمایاجاق یولداشیم دئیه
گؤزوم گؤزونوزه باخمایاجاق قارداشیم دئیه-
«قیلینج قینی کسمیرسه یئر قیتلیغینداندیر
و اوخ اوخلوغو دلمیرسه اؤیله‌جه.»
بیلیردیم
اوچسام گؤیلره
سیندیرار قانادلاریمی تانرینین ملئیکه‌لری
و گیرسم تورپاق آلتینا
چئینه‌یر سوموکلریمی تورپاغین کور سیچان‌لاری
اوچدوم بیله‌رک
گیردیم بیله‌رک
لاپ تورپاغین اوره‌یینه‌دک.
