یاد ائل‌لره پای…
مهرداد فخری
سکوت دریب سؤزو بیزدن
بیر کؤرپه‌یه تای اولموشوق.
کلمه کئچمیر دیلیمیزدن
قوروموش بیر چای اولموشوق.
کوله دؤنوب دیل کؤزوموز
یالان اولوب ایلک سؤزوموز
گؤره بیلمیر دوز گؤزوموز
بولوت توتان آی اولموشوق.
آددیم آتمیر بیزدن اومود
یادا دوشمور ائل، اوبا، یورد
اؤلوب بیزه دده قورقود
یاد ائل‌لره پای اولموشوق.
بئینیمیزده دوشونجه آز
قایغی درین، فیکیر دایاز
ایشله‌نیلمز دوداق – بوغاز
اوخو سینمیش یای اولموشوق.
قلبیمیزی قورخو یئییر
سئوینجیمیز کدر گئییر
یالان بیزه ناغیل دئییر
انسانلیقدا های اولموشوق.
۹۶نجی ایل – پاییز
