او گون اوزاق دئییل…
سحر خیاوی
قیزیل قفسین تک‌لیگینده کال داریخمالاریم
کندیر آسمیش بوغور منی؛
گؤیون ماوی کؤکسونده قیها چکیب آزاد قاناد چالان قوشلاردا حسرتلی باخیشلاریم؛
زَهَر اولسون بو دَن، بو سو
باشیمی آزیدان تورلار، تله‌لر!!
آاا….خ قَدَر اووچو
آچ ال آیاغیمدان بو آغیر قانداللاری!
گؤزلریمدن سونسوز آخان یاغمورلار
ایسلادیب قارتاللیغیمین قانادلارینی؛
ائله آغیرلاشمیشام کی،
اوچا بیلمیرم بونسوز دا؛
آمما اینانما دینج اوتوراجام
من بوغاز-بوغاز آل گونشی چاغیراجام،
ایشیقلیغی چیغیراجام.
امینم بیر گون فریادیم-
ییرتاجاق گئجه‌نین قارا اؤرپه‌یین؛
بوغازیمدان جانیخمیش قان فیشقیراجاق اوزونه،
گونش قوناق گله‌جک یوردوموزا،
قوروداجاق ایسلاق قانادلاریمی
و بیر دیشی قارتالین اؤنجول اوچوشون هامی بارماقلا گؤرسده‌جک!!
او گون اوزاق دئییل…
