عدالت ده وار…
ح. هریزلی
بو نه هاى، نه هاراى، نه واى خبرى؟
نه قده‌ر صنعت وار، صؤحبت وار، سازوار،
عدالت ده وار…!
نه قده‌ر دولانیر چرخین گردیشى
فصیللر ده‌ییشیر، پاییزوار، یاز وار،
عدالت ده وار…!
گئتدى غم-کدردن بیرآز دینجله،
دؤنه نسیل-نسیل ائللره گله؛
نه قده‌ر بو تورپاق دیرى‌دیر هله
خزر وار، اورمو وار، کور وار، آراز وار،
عدالت ده وار…!
هله «چنلى‌بئل»ده یاشاییر «جنون»
ایستى صحرالارى دولانیر «مجنون»
نه قده‌ر عشق وار، نه قده‌ر جنون
عاشیقده دؤزوم وار، معشوقدا ناز وار،
عدالت ده وار…!
نه قده‌ر «باکى» وار نه قده‌ر «تبریز»
«عدالت» عزیزدیر ائللره، عزیز؛
اونو یاشاداجاق سازیندا «چنگیز»،
چونکو بو یئرلرده سازا نیاز وار،
عدالت ده وار…!
نه قده‌ر یاندیریر «یانیق کرمى»
او حئیران قویاجاق بوتون عالمى؛
بیز سازدا تاپمیشیق سئوینجى، غمى
«هریزلى» نه قده‌ر عاشیقا باز وار،
عدالت ده وار…!
۲۴ شهریور ۱۳۹۶- هریس
