«قوشلارا داش آتمایین» مجموعه‌سیندن
کریم قربانزاده
۱
قاناد قوشلارا
یاغیش تورپاغا
هاوا اینسانا
کؤز اوجاغا
سن منه
من سنه یاراشیریق،
یاشادیریق هامیسینی
سئوگیمیزله….
۲
آدیم‌لا دانیشیب، گولسن
آغیر شله‌می چکه‌جکسن،
بیر یورغونلوق
بیر آیریلیق قازاناجاقسان.
هر سحر آخشام
عطرینی دویورام
تزه‌له‌نیر دونیام
یورغونلوغون
آیریلیغین
منیمله‌دیر زامان- زامان…
۳
اؤتن ایل‌لردن قالان
تکجه سن اولدون،
ال‌لرینده سیجاق‌لیق
باخیشیندا سئوگی.
یاشاماغا نه وار
بیر اودوم هاوا
بیر قاریش تورپاق
بیرده سن….
۴
باخیشین کؤورک
گولوشون کؤورک
اوره‌یین کؤورک ،
دیله‌یین کؤورک
سنینله سربست‌دیر زامان
سن بولوددان یارانیبسان…
۵
سن وارسانسا
اینام وارسا
وطن وارسا
دیوارلار یاشایاجاق
دان یئری قیزاراجاق.
گؤیده
بیر هارای
و یئرده
بیر بایراق قالاجاق….
