نارین شعرلر (۱)
فرانک فرید(ایپک)
(۱)
باشیمیز بؤرکسوز قالدی.
بوتون بؤرک‌لری
اؤز باش‌لارینا قویموشدولار، کیشی‌لر!
(۲)
کئفسیزلیـییمده،
قیزیل گول اوموردوم،
تیکان گتیردین
چیبانیمی نئشترلَمَیه!
(۳)
ساحیلین ایستی قوم‌لاریندان
گتیر تؤک اوستومه،
باسیدیراندا منی؛
سندن آیریلدیغیمی، بیلمه‌ییم بلکه!
(۴)
گوندوز گؤزو
گؤرمه‌دین،
هاندا قالا گئجه، سن!
(۵)
یوخودا آییلدیم،
یوخسا، یوخودان آییلدیم؟!
گؤردویومون قورخوسوندان،
یوخسا، گؤرمه‌دیییمین
سئوینجیندن؟!
(۶)
اوزومون حوزنونده آغلایان شراب
و بیر پرده گؤزیاشی، یئتَر کی
شعله چکدیره ایشیق‌لارا؛
آنجاق، گونه‌باخانین سرگردانلیغینا،
کیم یئتیشه‌جک،
گئجه یاریسی؟!
(۷)
قوناغییدون،
قونان قوش کیمی.
سینه‌مین دار قفَسینه یوخ،
گؤی‌لرین دورو نفَسینه
سئویرم سنی!
(۸)
الیمی الینده ایستی ساخلا.
بارماقلاریم بوزلاسا،
دونو چتین آچیلاجاق یازیلاریمین!
(۹)
خرمن اوسته گلمیسن،
قوجاق آچیغی گل!
قالانیم قوشلارین دی.
(۱۰)
گؤزومون ایچینه یئرلشیب ده،
گیلئیلی گیله‌لریمه باخمایان؛
گمیده اوتوروب دا،
گمیچی گؤزو چیخاردان؛
یاپیش کیرپیک‌لریمدن، بوغولما باری!
