دونندن بو گونه
یعقوب نامی
دایانمادان، گون به گون
آزالیر تلفونومون نومره‌لرینین سایی
دونندن بو گونه
سوزالیر،آزالیر،سوزالیر،آزالیر
مجید، ممدحسین،علی، حسن، مسعود، عابباس
بئله گئتسه
بیر من قالاجاغام بیرده تلفونوم
یاداکی بیر گون
بیر آلا تورانلیقدا
باهارسیز بیر پاییز آخشامیندا
منیم ده نومره‌م یولونو توتوب
گئده‌جک تک باشینا
سوزالا سوزالا آزالانا قده‌ر
گؤره‌سن هاچان
بیر تلفونون یوکو یونگول‌لشه‌جک منسیز؟
دونندن گتیردیکلریم یول آلیب گئدیر
بوگونوم یالنیز اؤزومله پایلاشیلیر
صاباحیما گومان یوخ گون باتان چاغلاری
تلفون نومره‌لریمین سوزالماسی چوخالیب
بلکه ده من آزالماقا باشلامیشام
یوخلایین تلفونلاریزی.
