اللی یاشیندا
سحر خیاوی
هله ده آینادا باخیر اوزومه
بیر اینجه، بیر کؤورک دلی‌سوو گلین.
هله ده باغلاییر قیرمیزی شالنان
کیچیک قاینی اونون شووه‌رک بئلین.
سن راحات یازیبسان اللی یاشینی،
منه آغیر گلیر اللی‌دن دئیه‌م!
بوشلاییب گول- چیچک الوان پالتاری
أینیمه آغیر دون خزل‌دن گئیه‌م!
هله ده گؤرنده بیر جوت سئرچه‌نی
سئوگیلی اوره‌ییم لاپدان آتلانیر.
هله ده سئوگینین آغیر نامینه
قامتیم أییلیر ایکی قاتلانیر.
داها چوخ گولمورم گولنده آخی
گؤزومون آلتینین چوخالیر چینی.
قوجالیق احساسی ائله بورویور
اللی یاش «سونامی»؛ یاخالیر منی.
قیناما هئی بویاغ وورورام باشا
سونبوللر عطیرلی اولونسون ساچیم.
دوداغا رژولا گولوش چکیرم
ایستیرم قوجالیق الیندن قاچیم.
بئله‌جه یازیرسان سن اللی یاشدان
آغیردیر من دئیه‌م وار اللی یاشیم!
باخمادان یاشیما منیلن یاناش
هله ده دلی‌سوو وار گلین باشیم!
یک پاسخ
بو قیز بوکلمه لری بیلمیرم هاردان تاپیر اشی الله سنی نه دئییم ائله مه سین ائله بیر هئچ بو دونیانین آدامی دئییل دوز دلی ائلیر آدامی