شاعیرینیز
بهزادبیات فرد(حسرت زنگانلى)
و… دالغا _ دالغالی وولکان باغیردى شاعیرینیز
و…یعنی گؤیلو بو داغدان آغیردى شاعیرینیز!
بیری… یولاقلاری یاغماقدا گوزلرین یالادی
بیری… اؤلوم چیغیریب دا، چاغیردى شاعیرینیز!
گئجه دؤشونده قارانلیق چؤکنده گؤزلرینه
گلین کؤچوردو گونش، قیز یاغیردی شاعیرینیز!
او یالقیزین یالی_یالنیزلاریندا تانریسی‌دی
یئتیم‌دی شاعیرینیز آخ ساغیردى شاعیرینیز!
گیلئیلی گؤزلری قانلی چاناقدی زنگانیما
بولوددو اوندا اسیردی، فاغیردى شاعیرینیز!
یابانجى‌لار هامیسى چیخدى بیر گونه بورادا
سؤزون بوغازدا کسیب آه بوغوردو شاعیرینیز!
یئریکله‌ییر گؤیولو بیر واراق‌جا بویلو قالیب!
سمیرجه آغرى چکیب شعر دوغوردو شاعیرینیز!
