سنسیزلیک‌لر (۲۶)
مجتبی نهانی
(۱)
گؤزله‌ییرم
گله جک…
یاغیش یاغاجاق
الیمده کی چتیر قوجالیب
سن هله ده گلمه میسن…
(۲)
قوجا قارلار
سیلکله‌نیر چیینلریمدن
یئل هر دیله گلدییینده…
قاردان آداملارین سونونجوسویام
خیالیمدا
گونش‌سیز قوجاقلار
ایسته‌ییم وار
هیچ بیتمه‌یه‌جکمیش کیمی قارلیغیم…
(۳)
توکلری تؤکولموش آغاجلاردان
آسلانان اینسانلار می
قارا قارغالار می
دوراجاق دوم-دوز
باخیشلارینین چیخمازیندا
باش آشاغی دامیر داریخمالاریم
سودسوز آجی سن سیز فینجانلاردا
(۴)
دئمه الیمدن نه گلیر
گؤزلریندن ایشیق آلیرام
قارانلیق گونلریمه
(۵)
«گئجه‌ن خئیره قالسین»، دئدین
سن سیزگئجه م خئیر اولمور آخی…
(۶)
قارقیشا گلدی قار
ایستی هاواندا…
