بوگون
ارشد نظری
بوگون،
بوتون کونفرانسلارین آلت اَنگی
عرب دادی وئریر
نئفت قوخوسو
نه وئجینه باشچی‌لارین
آسیادا قرنفیللر
پوْلیس‌لرین آتلارینا قَجَره‌دیر ؟
قوی گؤینه‌سین هله
خرجییه خالانین ساپ‌ساری باخیشلاری
جئییز ماغازالاری‌نین ویترینینده
بو ایل
بیر سوْیوق ده‌یمه‌ده بوْرجلو قالیب اؤتن قیشا او
قالسین هله دیشلری‌نین سئوینجی
قاتیرلارین دوْغماسینا !
یاراسانین کؤهول توْیونا
بوگون
کوره‌میزین طالعی،
آنا بانک مانیتورونون قاش- قاباغیندان آسیلی‌دیر.
دؤلتلرین غوُرورلو امنییت دووارلاری
گئییب اؤز قوُرشون کولگه‌لرینی.
گئجه- گوندوز
رئکلام‌دیر تؤکولن اینه‌کلرین آخورونا
آنتن چاناغیندان .
بلکه مئترودا
تله‌سیک دوْغولموش،
فهله قادینلارین کؤرپه‌لری‌نین
یوُخوسینا گیره بیلسین عدالت‌سیز دموکراسییا.
بوگون،
منیم سوُچوم بیر سینیق پنجره‌مدیر
او دا هله،
گئجه‌لرین بوُینوزوندا سورگون گئدیر.
هئ…………….ی،
خئیری اولسون قوُشلارین
اونلارا
نه پاساپورت گرکلی‌دیر سرحدلردن آشماغا
نه صلاحییت لازیم‌دیر پارلامئنت دامیندا اوچماغا.
بوگون
شوشه دونیا بیر دَجَلین اوْوجوندادیر
کئشگه بیردن بیره
اوُزاقدان دوُیمایا اوْ شیلتاق بیر هاوا شارین
یاخود
بیر قار آدامین بوینوندا شالی
یوخسا دوشوب سینار پول- پول اولار کوره‌میز
وال ایستریت بوُرسوندا
