دالغا
مرضیه احمدی اسکویی
خیرداجا اینجه آرخیدیم
مئشه‌لردن، داغلاردان
دره‌لردن آخیردیم؛
بیلیردیم دورقون سولار
اؤز ایچینده بوغولار,
بیلیردیم دریالاردا
دالغالار قوجاغیندا
خیرداجا آرخلار اوچون
یئنی حیات دوغولار؛
نه یولون اوزاقلیغی
نه قارانلیق چوخورلار
نه دورقونلوق هوسی
منی یولدان قویمادی؛
ایندی قاریشمیشام من
قورتولماز دالغالارا؛
وارلیغیمیز چالیشماق
یوخلوغوموز دایانماق.
پائیز ۱۳۵۲
2 پاسخ
حیف اولسون بو آذربایجان اینجی لرینه…
بو گنج یاشدا بئله بیر شعری یازماق بو دئمکدیر کی گله‌جکده بیر تورک شاعیر آذربایجانیمیزین شعر دونیاسیندا و ادبیات صاحه‌سینده باش گؤستره‌جکمیش.سایقیلاریملا