کاش کی…
بهروز صدیق

ایستک‌لریم بوغولوبدو گؤزومده
أخار بیر چای “آراز” آدلی گؤزومده
جانا گلمیش اللریمدن دؤزوم ده
کاش کی منی دوغمایایدی هئچ آنام!

باغریمداکی یارالاریم بیتیشمز
تیتره‌ک الیم اللرینه یئتیشمز
هاراییمی بو کار فلک ائشیتمز
کاش کی منی دوغمایایدی هئچ آنام!

اپرییبدیر دوداغیمدا ماهنی‌لار
بوش بوشونا یولا دوشموش بو قاطار
اوره‌ییمده یارالانان دورنا وار
کاش کی منی دوغمایایدی هئچ آنام!

گونش ندن یئر اوزوندن قاچاسی؟!
داغدا ساغیر لالا یارپیز ناناسی
دونیامیزین یانماقدادیر آناسی
کاش کی منی دوغمایایدی هچ آنام!

گؤز اؤنؤنده ظولمات آتین اوینادیر
آتیلان داش سینان ایسه آینادیر
نه دیر گؤرن بو قالماقال قیرهاقیر؟!
بو دور کی من دوغولماغا پئشمانام
کاش کی منی دوغما یایدی هچ آنام!