عؤمور یولو
سیدجلیل حسینی
آددیم-آددیم انسان اوغلو
آددیملاییر عؤمور یولون…
عؤمور نه دیر؟
عؤمور دئمک
ایپک قاناد بیر دویغودور
خیال‌لارین قوجاغیندا،
آددیملانیر عؤمور یولو.
عؤمور واردیر بیر آددیمی
مین-مین آددیم دالغالی‌دیر
عؤمور واردیر مین آددیمی
نه ایزلی‌دیر، نه توزلودور…
عؤمور نه دیر؟
عؤمور دئمک
بیر مورگودور کاییناتین گؤزلرینین بَبه‌گینده
ایلک محبت لای لاسی تک،
سون باخیشین دالغاسی تک…
عؤمور نه دیر؟
عؤمور دئمک
هرانسانین آلاتوران بیرسحرده
قاطارلانمیش آرزوسونون حاققا دوغرو گئدن ایزده
الدن چیخمیش اؤوساری‌دیر..
عؤمور نه دیر؟
عؤموردئمک
قیوریم-قیوریم آرزو تئلی
دالغا-دالغا دوشونجه‌دیر سونسوز خیال دنیزینده..
عؤمورنه دیر؟
عؤمور دئمک
دوشونجه‌نین آددیملانمیش ایزلرینین
یولدا قالمیش بیر توزودور…
عؤمور،
زامان اؤلچوسودور،
زامان،
عؤمور قایچیسی‌دیر.
