چئویرن: ایشیق
ترجمه: ایشیق
ایشیق

چنگیزیم!
هاشم ترلان

(اوستاد عاشیق چنگیزه اتحاف)

سن دونیایا قوشا گلدین سازینلا،
دووران سنی اوخشامادی نازینلا،
ایندی هنر میدانیندا یازینلا،
“برج میلاد” اووجوندادیر چنگیزیم،
سنین خالقا بورجوندادیر چنگیزیم!

یوردوموزون دره‌سینده، دوزونده،
نورلو گونش پاریلداسین گؤزونده،
هر اؤلکه‌یه قدم قویسان ایزینده
آنا دیلیم لایلا دئسین چنگیزیم،
سئوینجیمی پایلا دئسین چنگیزیم!

سن چالاندا ناله قوپور دریندن،
اورکلری اوینادیرسان یئریندن،
گویده اوچان دورنالاردا پریندن
له‌لک سپیر صنعتینه چنگیزیم،
هنرینه، قدرتینه چنگیزیم!

بارماقلارین توخوناندا سیملره،
هئچ بیلمیریک دونیا قالیب کیملره،
پرده‌لرده زیل دؤننده بملره
روح اویانیر کؤنوللرده چنگیزیم،
قلم چکیر غمه، درده چنگیزیم!

یئره باخدیم، گؤیه باخدیم اؤترگی،
دونیامیزین نه آخیری، نه ایلکی،
او سئحیرلی مضرابیندا نه وارکی
اورکلری حیران ائدیر چنگیزیم،
اوفوقلره آخیب گئدیر چنگیزیم!

چال قارداشیم نغمه‌لرین گور اولسون،
گئجه‌لرین گوندوزونده دورولسون،
او گون گلسین توی مجلسی قورولسون،
یازا چیخسین ائللریمیز چنگیزیم،
شاققیلداسین سئللریمیز چنگیزیم!

تار اوتانار سنین سازین دیننده،
اینجه‌لیکلر وجده گلیر سیننده،
آدین، سانین کؤهلنینه میننده
کؤنوللره کمند آتیر چنگیزیم،
آیا، گونه قاش – گؤز آتیر چنگیزیم.

سن آذری ائولادیسان، غمین کم،
شوخ آدینلا فخر ائیله‌ییر بو اؤلکم،
اوزون آغدیر، باشین اوجا و محکم،
اوغور اولسون امه‌یینه چنگیزیم،
شرف یاغسین دیله‌یینه چنگیزیم!

«فرخ» ، «سولدوز» قان قارداشین سنین تک،
اودا ماهنی عالمینده بیر چیچک،
صاباح تاریخ اوزونوزدن اؤپه‌جک
باشیزا نور سپه‌جکدیر چنگیزیم،
آلنینیزدان اؤپه‌جکدیر چنگیزیم!
۲۷ آبان ۱۳۸۹- تهران

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

چنگیزیم! / هاشم ترلان

ایشیق
www.ishiq.net

آذربایجان ادبیات و اینجه‌صنعت سایتی

چنگیزیم! / هاشم ترلان

ایشیق
www.ishiq.net

آذربایجان ادبیات و اینجه‌صنعت سایتی

چنگیزیم! / هاشم ترلان

ایشیق
www.ishiq.net

آذربایجان ادبیات و اینجه‌صنعت سایتی