ایکی غزل
محمد فرید «نادم»
۱)تؤکولور
یئری یئری یئریشوندن آ نازلی ناز تؤکولور!
گلین – گلین باخیشوندان بزه‌کلی یاز تؤکولور.
سوری – سوری قوزولار اوتلاییر دؤشونده سنون
سن آغلایاندا گؤزوندن آخیر آراز تؤکولور.
او دوم – دورو بولاغوندان سو ایچمه‌گه نازلیم
قاطار – قاطار نه گؤزه‌ل دورنا گؤزلو غاز تؤکولور.
قونوته ال گؤتورنده یاشیللانیر یئر، گؤگ
قیام ائدنده بوتون باغچادان نماز تؤکولور.
دوغولدو گل بو غزل کؤرپه‌سین آغوزلاندیر
حنورتودن قورویوب دور داماغ بوغاز تؤکولور.
منیم ده کهلیگیم آزغین دوشوب قاییتمیر هله
سؤزوم ده دادسیز اولوبدور کوناز – کوناز تؤکولور.
دئییشمه‌لر ده یتیملیک سئویر یتیم قالسین
صدفلی ساز بوغازیندان آجی آواز تؤکولور.
گلینجیغازلارینی یئل سوپوردی وئردی سئله
گؤزوم یاشی او سببدن جهاز- جهاز تؤکولور.
نه دوزدا دوز، نه چؤره‌کده چؤره‌ک دادی قالمیش
یاغیش کیمین یئره نیفرت پالاز- پالاز تؤکولور.
گونئیده گون منی حالدان آپاردی چک قوزئییه
گؤزوم یاشی قورویوبدور آز- آز، آز- آز تؤکولور.
۲) بیزه گل!
اوتانما سودیجییم بیر چیراغ گؤتور بیزه گل!
هئچ اولماسا گونشی توت قوناغ گؤتور بیزه گل!
یوبانما یول – بره‌لر چن دومانلودور دادلیم
الونده بیر لالا یاندیر آیاغ گؤتور ببزه گل!
اننده یال – یاماجی، داغ – داشی، چایی، چمنی
بنؤشه‌دن، نانادان بیر قوجاغ گؤتور بیزه گل!
گلنده البه سوونلوق ائدیب یولو چاشما
قوشول قاچاغلارا سایسیز قوچاغ گؤتور بیزه گل!
سیلیب سوپوردو سوینجی بو یئل بوسئل ائودن
سئوینجه ایمکانین اولسا قاچاغ گؤتور بیزه گل!
بو دام، بو ائو، بو باجا گولمه‌ییر دوداغسیزدور
دوداغ – دوداغ گولر اوزلو دوداغ گؤتور بیزه گل!
باهار بولوتلاری آق کؤینه‌گین هاچان ساغسا
آماندو یاز ساغینینان چاناغ گؤتور بیزه گل!
بولاغ باشینداکی تر تر عطیرلی یارپیزدان-
دریب بیچیب کومادان بیر تاباغ گؤتور بیزه گل!
گونش تئلین آچیب هؤرمک قالیبدو تکجه سنه
چینار تئلیندن آییر سن داراغ گؤتور بیزه گل!
عاراق چین الده دوشنده یولون اوزوم باغینا
گلنده بیر کاسا دولدور عاراغ گؤتور بیزه گل!
سودا آیا یوموروق ویرماغا گلین – قیزلار
قاییت گؤزون دولوسی آغ بولاغ گؤتور بیزه گل!
دالار یامان اوره‌یین گوللرین یامان دالاییر
گلنده بالتا گتیر سن اوراغ گؤتور بیزه گل!
