قورتولوش آتشی
یحیی شیدا
قفس‌ده قانادی سینمیش بیر قوشام،
وارلیغیم داغ- داشا چؤله باغلی‌دیر.
یاشارام گله‌جک باهار عشقینه،
حیاتیم چمنه، گوله باغلی‌دیر
قفس‌ده اولسام دا، کسیلمز سسیم،
سؤنمز بو قفس‌ده عشقیم، هوسیم،
اؤلنده، دئیه‌جک بو سون نفسیم:
اوره‌ییم بیر شیرین دیله باغلی‌دیر.
قورتولوش آتشی قلبیمده یانیر،
دوشدوکجه یادیما، شام تک اودلانیر،
عاریف‌لر بو سؤزو دئمه‌دن قانیر:
ییخیلماز هر کس کی، ائله باغلی‌دیر.
شیدایام، تورپاغا، وطنه وورغون،
بولبول تک باهارا، چمنه وورغون،
گؤللره، گوللره، گولشنه وورغون،
اوره‌ییم ساز کیمی تئله باغلی‌دیر.
یک پاسخ
نور ایچینده یاتمیش اولان، چوخ ده‌یرلی استاد شیدایا اتحاف:
سن گئتدین گئده‌لی قلبیم اوتولدو
اؤکسوز قالدی سؤزلر، بوینو بوکولدو
یاس توتموش گوللرین باغری سؤکولدو
بیلمه‌دین سوسن بولبوله باغلی‌دیر….