قورتولوش آتشي
يحيي شيدا
قفس‌ده قانادي سينميش بير قوشام،
وارليغيم داغ- داشا چؤله باغلي‌دير.
ياشارام گله‌جك باهار عشقينه،
حياتيم چمنه، گوله باغلي‌دير
قفس‌ده اولسام دا، كسيلمز سسيم،
سؤنمز بو قفس‌ده عشقيم، هوسيم،
اؤلنده، دئيه‌جك بو سون نفسيم:
اوره‌ييم بير شيرين ديله باغلي‌دير.
قورتولوش آتشي قلبيمده يانير،
دوشدوكجه ياديما، شام تك اودلانير،
عاريف‌لر بو سؤزو دئمه‌دن قانير:
ييخيلماز هر كس كي، ائله باغلي‌دير.
شيدايام، تورپاغا، وطنه وورغون،
بولبول تك باهارا، چمنه وورغون،
گؤللره، گوللره، گولشنه وورغون،
اوره‌ييم ساز كيمي تئله باغلي‌دير.
یک پاسخ
نور ایچینده یاتمیش اولان، چوخ ده‌یرلی استاد شیدایا اتحاف:
سن گئتدین گئده‌لی قلبیم اوتولدو
اؤکسوز قالدی سؤزلر، بوینو بوکولدو
یاس توتموش گوللرین باغری سؤکولدو
بیلمه‌دین سوسن بولبوله باغلی‌دیر….