آتیب گئدیریک
رحیم کاویان شبستری

باهارلا باشلانیریق، قیش گلیر بیتیب گئدیریک،
سامان کیمی دوشوروک سئللره ایتیب گئدیریک.
فلک بیزی قووالیر، بیزده دورمادان قاچیریق،
بیر آزجا دینجه‌لیریک، یوکلری چاتیب گئدیریک.
نسیم کیمی اسیریک، چای- بولاق کیمی آخیریق،
گونش کیمی چیخیریق، آی کیمی باتیب گئدیریک.
قوجالداراق بیزی دونیا اؤزو جاوان قالیری،
مین آرزی- حسرتیله وارلیغی آتیب گئدیریک.
بو قارقیمیش فلک ایله آلیش- وئریش ائدیریک،
ده‌یرلی عؤمرو ده‌یر- ده‌یمزه ساتیب گئدیریک.
گولن آز اولدو بو گولشنده، ‌آغلایانلار چوخ،
گولوشله آغلاماغی بیر یئره قاتیب گئدیریک.
اوره‌کده بسله‌ییریک شوخ گؤزللره سئوگی،
سئویملی سئوگیلی بیردن- بیره آتیب گئدیریک.
بیری هارا آپاریر بو باهار، پاییز، یای، قیش،
اجل گلنده یوموب گؤزلری یاتیب گئدیریک.