پنجره
سیدجلیل حسینی

اوز – اوزه آچیلان بیر جوت پنجره
گؤز – گؤزه باغلادی ایکی اوره‌گی.
چکیلدی هر گؤزده مین بیر منظره،
پاییزدا آچیلدی باهار چیچگی؛
لال دینمز دانیشدی اوره‌کلر خیلی،
بیری آجیقلی‌دی، بیری گیلئیلی.

اوره‌کلر تیتره‌دی، اسدی یارپاق تک
مین سیرری آچدیلار بیرجه باخیشدا.
آخدیقجا گؤز یاشی محبت دئمک
گؤرسندی گؤزلره مین بیر ناخیشدا؛
لال دینمز دانیشدی اوره‌کلر خیلی،
بیری آجیقلی‌دی، بیری گیلئیلی.

گئجه‌نین ساچینا دوزولموش اولدوز
خوروزون بانی‌یلا سوزولوب ایتدی.
زولیخا میثاللی اغ بیلکلی قیز
اؤرتوب پنجره‌نی، باش آلیب گئتدی؛
لال دینمز دانیشدی اوره‌کلر خیلی،
بیری آجیقلی‌دی، بیری گیلئیلی.