ایکی شعر
حسین امکانی (ح.خوجالی)
(۱)
حسرت قالدیق بو دونیانین داری‌سینا
گؤرنمه‌دیک شیطانینی
یئتیشمه‌دیک تاری‌سینا
اینجیتمه‌دیک جوجوغونو
توخونمادیق قوجاسینا، قاری‌سینا
گلیب چاتدیق آلتمیش یاشین یاری‌سینا
باخیب گولدوک اوزوموزون ساری‌سینا
دؤزوب باخدیق،
هر بیر شئیی سئزیب باخدیق
گؤرن گؤردو،
ویران ویردی
هله دیم_دیک گؤز دیکمیشیک،
قان اودموشوق،
اود بیچمیشیک
ویریلان وار یاد اللره
قوغولان وار بو ائللره
گوج گلمیشیک،
قارنیمیز آج، گؤزوموز توخ
هئچ بیر پای دا گؤزوموز یوخ
اومودوموز آرخامیزدیر،
آرخامیزدا قارلی داغلار
پاپاقلاری بارلی داغلار،
وارلی داغلار…
(۲)
اوره‌گینده بیر آلوو
اوره‌گینده بیر کؤز
اوره‌گینده بیر شاختا
اوره‌گینده بیر بوز
اوره‌گین چوخ ایستی سویوق اولاجاق
اوره‌گیندن گؤره‌سن کیم بویلاناجاق؟
اوره‌گینده بیر داش، اوستونده مامیر
اوره‌گینین باشینا دامجیلار دامیر
اوره‌گین عؤمرومو چوخ اوزون سانیر
تانییان دا تانیییر،
دانان دا دانیر
اوره‌گیم چوخ ائنیش-یوقوشا توشور
اوره‌گیم اوجادان آلچاغا توشور
اوره‌گیم چوخ اوشور- اوره گیم چوخ اوشور
هرزاد بو گونلر قلبیمه گلیر
هرزاد بو گونلر گؤزومدن توشور
