آغ_قارا
ائلتاش صالیحی
سن آغ-قارا شکیللری سئوردین
منسه آدینی چکیردیم دوققوزا
اون بارماقدان بیر اسکیک
او
سن‌سن
تاماملاییردین سایی‌لاریمی
تاماملاییردین اللریمی،
چیک…
آغ_قارا بیر فوتو
اورتا عصیرلریمده دوشونورم بارماقلاریمی
آغزیمی یوخلایان محکمه‌لردن قوتولسایدیم
بیر داها باشلاردیم سئومه‌گینی
اورتا دوغومدا آختاراردیم الیمی
ال باراژلاریمی آشدیغیندا بو دنیز
قورویاجاقدی گؤزلریم
گؤردوکلریم سندن جینایت
گؤرمه‌دیکلرین‌ده،
یاپدیقلارینین باخلووو یئرآلمیش ایچ دونیامدا
ایکی نفس آلیب
بیرین پؤسگوروم
ایکی نفس آلیب
بیرینی پؤسگوروم نفسلریمده
سن گؤزلرینی پارلا اولدوزلارا
آی
بیر ایمگه‌دی منده
آی رئال
آراز رئال
دامارلاریمیزا یاغدیردیغین قار رئال
وطن …
وطن آغ_قارا بیر شکیل
اورتاسیندا سن گولورسن
وطن آغ_قارا بیر فوتو
سن سئوردین اونو
منسه دوخسان بیره ساییرام وطنی
اونونجو بارماق‌سنده قالدی ذاتن
