بوگون چهارشنبه 1 اردیبهشت 1400 ساعات 05:50
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

masoom
آلین یازیسی
معصوم جبارپور

آلین یازیمی چوخداندیر
بو شعرین قاپیسیندان آسمیشلار!
بلکه گونلرین بیریسی
بیر زامانلار
سئوگی منده بؤلونوب
من اوندا
او ایسه منده یاشامیشیق!
ایندیسه
هئییی
تانینماز سئویسی،یوخسان!
بیریسی اولسایدی
بو قیزجیغازین، هانسی پنجره_
آردیندا اولدوغونو بیلسه‌یدی؟
بو گونلریم
آبامین قانلی اؤکسورمه‌لرینه بنزه‌ر
بیر آغیر آغری
دوشونجه‌لریمی یاخالاییر!
ساییقلاییرام
بلکه بوگونلر
بیر گولوجوک فورمتیله
بیر اولای اولدو _
بیر اؤلونمز ایلقار
بلکه
گئج
بلکه
اوزاق
بلکه بو گونلر!
بیلیرسنمی ؟
تانرینین
یاساسیندایدی
عدالتین، اینصافسیزلیغی!
منی ازن دونیایا بنزه‌مک ایسته‌ییرم
بایقوش قاینایاجاق مندن
اؤلوم یاغاجاق ناموسسوز گؤزلردن
هئییی
چوروموش سؤزلر
اؤزلم دیلک‌لری دئیه بیلمه‌دی
سئوه-سئوه سنسیز یاشاماق بیلیرسنمی نه دیر؟!
هر آخشام چیغیریر اوره‌ک
ایچریم یانیر
دیره‌ک به دیره‌ک
هئچ گؤرورسن می؟
نه اولور بیر گئجه
بیر ائرکک_
وودوی آلن رولوندا آپارسین منی _
۱۹-نجو یوز ایللییینه
تبریزده پاریس یاشاییم
سئوگینین گؤزونو یوللارا تیکیم
اوتوروب
سورئال سئوگیلی‌لریله ال-اله وئریم
آجی رئال لارا الوداع دئییب
اؤلولر سئوگی‌سیله بیر اوخئی دئیم
گئت رئال سئوگیلینله گؤزل یاشا
گئجه‌لر تبریزده
پاریس گئجه‌لری یاشانیر _
یاشایا بیلمز کیمسه‌لر …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *