دایاناجاقدا
ع. یالچین
دایاناجاقدایام
یاغمور یاغیر؛
بورونوب خیال کورکونه،
بله‌نیب یاغیشین یوکونه
یول گؤزله‌ییرم.
پاپیروزلاریم بیر –بیر اؤلور قارشیمدا،
دوراقداکی سس‌سیزلییین جینگیلتیسی-
دولانیر باشیمدا.
تالا-تالا بولودلار
بوشالیر دولور،
دولور بوشالیر؛
قاش قارالیر
جانیما بیر اوشوتمه آخیر،
یاغمور یاغیر آغیر.
دایاناجاقدا بیر منم،
بیر کیریمیش سئرچه بالاسی
بیرده هورکوموش دوشونجه‌لر،
اوستومه هوجوم چکمه‌ده‌دیر ییرتیجی گئجه‌لر…
قولاغیما بیر سس دوشور
بیرآنلیق ایشیق‌لا دوراق گؤروشور،
سئوینجدن گیجه‌لیرم
سسله‌نیرم
آهاااااای، آهاااااااااااای
آزادلیق پراسپکتی!…
یولونو آلیب گئدیر ایتی –ایتی
دورمادان،
دؤنوب باخمادان.
یاغمور یاغیر،
دویغولاریم گولله‌له‌نیر.
دایاناجاقدا بیر منم،
بیر کیریمیش سئرچه بالاسی
بیرده هورکوموش دوشونجه‌لر،
اوستومه هوجوم چکمه‌ده‌دیر ییرتیجی گئجه‌لر…
