باشیمدا آرپا بوغدای ساچلاریم
افراسیاب نورالهی
باشیمدا،
آرپا بوغدای ساچلاریم..
باشیمدا،
قوزئی گونئی ایقلیم‌لریمین
گونش کولگه آیریلمازلیغی..
فصیل‌لریمین قیش‌لیغی، پاییزلیغی، یازلیغی..
باشیمدا،
آغلی قارالی گونلریمین گوموشو یایلیغی..
باشیمدا،
اوره‌ییمین ایستیسی، سویوغو
و هر گون،
بیر آز قوپوب دوشن اوره‌ییمدن،
ساچلاریما دوشن دن..
باشیمدا،
گئجه، گوندوز..
غروب، دان..
باشیمدا،
آغ دان، قارادان عیبارت،
باشیمدا اوره‌ییمدن ایکی علامت، نیشان..
باشیمدا اوره‌ییم شان شان..
باشیمدا،
بوتون اوره‌ییمدن اولانلار
بوتون باشیمدان گئدن‌لر
بوتون باشیما گلن‌لر
باشیمدا،
بوتون خیالیمدان اؤتن
باشیمدا وطن
و وطنیمین گؤیلرینی توتموش بولوت
باشیمدا،
توتولموش قاشیم، قاباغیم
دولموش گؤزلریم، گوزلرین
باشیمدا،
باشیمدان اسکیک اولمایان دومان، چن
باشیمدا،
بیر شهر حسرتیم تبریز
و باشیمدا،
سنی گزدیریرم سئوگیلیم…!
