تانری گؤیدن یاغا سنی
عدالت دومان
یارادان سولطان یارادیب
بو دمه، بو چاغا سنی.
بلکه طالع بو حوسن ایله
چکیبدی سیناغا سنی!
طالعیمیز ائده کرم
نوبارینی اؤزوم درم
هارا باخسام سنی گؤرم
تانری گؤیدن یاغا سنی.
کیمدی من تک حسرت چکن؟
یالواریجی، مینّت چکن
ایللر بویو ظوٍلمت چکن
ده‌ییشمز چیراغا سنی.
بو حسرتین داشین آتام
آرزویا، ایسته‌یه چاتام
زرگر اولام زره توتام
تپه‌دن دیرناغا سنی.
من‌ده سیزین ماحاللی‌یام
عشقینده مجنون حاللی‌یام
چرشنبه‌ده شال ساللییام
قویالار قورشاغا سنی.
کاش هر یازی یازیلمایا
یازیلانلار پوزولمایا
گولون عؤمرو آز اولمایا
بنزه‌دم زانباغا سنی.
دئمه شاعیر دیوانه‌دیر
سؤیله درده دوا نه‌دیر
تشبیه ائده‌ن یگانه‌دی
گول اوسته یارپاغا سنی.
دولانیرام آبدال کیمی
آلیشیرام تونقال کیمی
قیشا قالمیش شان بال کیمی
قاتام ساری یاغا سنی.
عدالته اولمادین یار
آی سینه‌سی داغداکی قار
قارداندا آغ گؤره‌ن نه وار؟!
بنزه‌دم او آغا سنی.
