هانی کوراوغلوم؟ هانی بابکیم؟!
بهروز صدیق

بلشدی آل قانا آه! آنا تورپاق
قالاندی باغریمدا اود قالاق-قالاق
مئهریبان داغلارا قارانلیق یاماق
هانی بس کوراوغلوم، هانی بابکیم؟!

قاناتدی کؤنلومو قارا بیر کدر
یاد اللر باغیمین گوللرین درر
بئینیمده آغلاشان قانیم دیللنر:
هانی بس کوراوغلوم، هانی بابکیم؟!

تورپاغین اؤلومو آغیرمیش آغیر
بو اودلار یوردونا قانلی اود یاغیر
داغلاردا لاله‌لر قالدیلار ساغیر
هانی بس کوراوغلوم، هانی بابکیم؟!