اعتدال
رقیه کبیری
ارگنه‌گوندور
مارس آیی‌نین اییرمینجی گونو
گون، بو گون اعتداله چاتیر
دریسی بوغازیندا بیر بالیقچی
نه اعتدال وئجینه‌دیر
نه ارگنه‌گون
بوغازاجان دنیزه باتیب
گئجه سردیغی پَره‌نی خزردن ییغیر
بالیقلار بایرام ائدیب،
پره،
کاسیبین بختینه بنزه‌ییر.
تانیدیغیم بیر یازیچی
زامانین یئتمیش بئش ایل اؤنجه‌سینده
«اؤزونه عایید اتاق»یندان بئزیب
«اوز» چایی‌نین قیراغیندا
جیب‌لرینه داش دولدورور
گونلری ساییر، مارس‌ین ۲۸-ینه چاتسین…
مارس آیی‌نین اییرمیسی‌‌‌دیر
گون بو گون اعتداله چاتیر
خرزین آغ بالیقلاری
بایراق توتوب دالغالانان قارا فیکیرلریمه
یئنی رمانیمین کاراکتری
بئینی اؤلموش آروادینین ارگانلارین باغیشلاییر
یازیچی‌نین جیبینه أل اوزالدیرام
اوغرونجا
بیر اوووج داش
تؤکورم بالیقچی‌نین پره‌سینه
«اوز» چایی
یازیچی‌نین آغیرلیغیندان جان قورتاریر
بالیقچی،
داشا دولموش پره‌نی
قومسالدا سوروتله‌ییر…
چابکسر. ۱۳۹۵٫۱٫۱
