ایکی شعر
امین حبیبی

(۱) سئوگی
اوچ قانادلا اوچورام:
بیری یاشادان
بیری یئتیرن
بیری فانی…
من ده بیر قوشام آخی،
منه اوچماغی اؤیره‌دن
سئوگی دولو یاشاییشیم؛
اوجالدیم دئیه- دئیه قوجالمادیم،
اؤلدوم …
من یاخجی یاشاییرام یاشاییشیمی:
– سئوگی دولو –
فانی‌سی فانی
یئتیرنله
دفعه‌لرله…

(۲) دینسیز سکوت
بو دینسیز سکوت
منی لاب جایدیریر،
اولسایدی بیریسی
یقین
داغلار، آغاجلاردا-
باشلارینی قویوب یاتاردیلار راحات…
یقین
چوخ فیکیر وئردیم دونیایا
هارداسا دویولور گؤیون رنگی،
باخیرام
قدیر روستموف اوخویور:
-آی دیلی دیلی دیلی دیلی دیلی دی-
دیللر دئییر ازبردن:
الله اکبر…!
باخ
گؤرورسن من دئدیگیم منظره‌نی؟
من
بئله یازدیم کیتابیمی …