گؤره‌سن …؟
ارشد نظری

یام یاشیل مئشه‌لر، آلمالی باغ‌لار
دورنا گؤز بولاق‌لار، چیچکلی داغ‌لار
سه‌ییرَن کهلیکلر، گؤزل سونالار
گؤره‌سن واریمیش یا هئچ یوخوموش؟

سس‌سیز دره‌لرده بیتن بنؤوشه
قونچه‌لر آچیلا اوزلر گولوشه
اوشاق‌لار اوینایان دووارسیز مئشه
گؤره‌سن واریمیش یا هئچ یوخوموش؟

بیری بیرین سئومک پولسوز- پاراسیز
شاققا چالیب گولمک دردسیز، یاراسیز
آرخایین یاشاماق سؤزسوز قاراسیز
گؤره‌سن واریمیش یا هئچ یوخوموش؟

داغین زیروه‌سینده آغلایا گؤزه
قایادان گؤموشو شلاله سوزه
قارانلیق گئجه‌لر چاتا گوندوزه
گؤره‌سن واریمیش یا هئچ یوخوموش؟

گئجه‌لر یوخودا آغ آتا مینمک
قاپی دؤیولنده اورک سئوینمک
سازیلان سؤزولن ائلی دیندیرمک
گؤره‌سن واریمیش یا هئچ یوخوموش؟

گولردی قیز- اوغلان بو گئجه توی وار
اوره‌ک‌دن سیلینیب گئدردی قوبار
بیرده او مهربان ال‌لر، خینالار
گؤره‌سن واریمیش یا هئچ یوخوموش؟

دویون‌لر آچیلا دوس‌لار الیله
قونشو قونشوسونون دیلیله گوله
باجینی گؤرمه‌یه قارداش‌لار گله
گؤره‌سن واریمیش یا هئچ یوخوموش؟

تارلالاردا سوزه‌ن تئللی توراغای
هریانا باخسایدین بولاغیدی، چای
کندین آخشام چاغی قیز- اوغلان های- های
گؤره‌سن واریمیش یا هئچ یوخوموش؟

به‌ی اؤز قورشاغینا سؤزون باغلایا
قاینانا جاوابین دوزون باغلایا
گلین او قورشاغا اؤزون باغلایا
گؤره‌سن واریمیش یا هئچ یوخوموش؟