ایکی شعر
سوسن نواده‌رضی
(۱)
سحر- سحر
آلمالیق‌لارا
دامجی – دامجی داماندا گونش
قولاغیوی دایا دوداقلاریما
یرپاق‌لارین یاشیللاشما هوسینی
نارین- نارین
پیچیلداسین سنه.
یئل سوپورنده گونشی یئردن
قوشلارین شعریمه سوسوزلایان چاغی
سسیم
بوداق- بوداق
جوجه‌ریب گؤیه‌ره‌جک آغاج لاردا…
(۲)
ابدیت نه جور بیر شئیدیر؟
اوردا دا می غربت وار؟
اوردا دا می آییریرلار آداملاری
اؤز- اؤزوندن؟
بیربیرلریندن؟
و کیملیکلریندن؟
ابدیت نه رنگده‌دیر؟
گؤی رنگی وارمی؟
قیرمیزیسی نئجه؟
و یاشیلی؟
منه بیر شال گتیر ابدیت‌دن
یئل قاچیرتسا، بوراخ قاچیرتسین
من قارا رنگی هئچ سئومرم
اوردا دا می سئوه‌نی اینجیدیرلر؟
اوردا دا می قان اوتدورورلار وورغونلارا؟
ابدیتده وطنین آدی نه‌دیر؟
سئومک اولارمی، قورخمادان، وطنی؟
اؤزونو،
دیلینی
دیله‌یینی منیمسه‌مک اولارمی هده قورخوسوز؟
«سئویرم» دئمک اولارمی سئوگیلینه قارا یاخیلمادان آداما؟
اورمو گؤلوسو نئجه؟
اورموسونو گلین- گلین چوروتمورلرمی گؤره‌سن؟
من ابدیتده آدام دوغمیاجام،
بؤیویوب آلا گؤز جئیرانلاری اوولایار بیردن……
