آجیندان بیر قادین آغلادی
افراسیاب نورالهی
باشیمدا آرپا بوغدای ساچلاریم
اوره ییمده آغ قارا آجلاریم
باشیمدان اوره ییمه هاا.. اوزانار، یئتمز
او گون بیر حاللار گوردوم
اولرم ده گوزومدن گئتمز؛
آجیندان بیر قادین آغلادی
باشیمدا آرپا بوغدای ساچلاریم
اوزانار،
آیاغیما سالاما گلر
بو اویله بیر درد کی،
نه گویه یئرلشر، نه یئره سیغار
نه ده کی،
بیر شعره، کالاما گلر؛
آجیندان بیر قادین آغلادی
باشیمدا آرپا بوغدای ساچلاریم
باشیمین باشیما قاخینجی اولوب
صاباح سون چرشنبه بایرامیدی
سانجیسی او گوندن قارنیما دولوب؛
آجیندان بیر قادین آغلادی
۱۳۹۴/۱۲/۲۵
