ایستیرم گئدم
براتعلی فتح اللهی (ساوه – نوبران)

آهای، ساچلاری گتیره‌لی اوْغلان!
هاردا قویلامیسان؟
گتیر کَلَشلریمی!
ایستیرم گئدم.
بو شهریدن گئدرم-
گئج یا تئز.
قالیب دؤزه بیلمم-
بو شهریدن گئدرم من
گتیر کلشلریمی!
قیرخ ایل گئچیبدیر اوْ گوٍندن-
اوزون بورون اتوبوس کنده گلمه‌میشدی هله
کی من،
تمام ییرلریمی-
بوغدالیقلار ایچینده‌کی
بیلدیرچینلره تاپشیردیم.
و سویوت‌لر ایچره گزن یئللره
بوْرج وئردیم بالابانیمی
قمیش قلملریمی.
نئچه یاریمچیلیق یازیلان دفتریمی
و سوپاندیمی
کؤرپه عم اوْغلانلاریما
یادیگار وئردیم.
اوٍرَک سیٌخینتیمی آمما-
قویو گؤگرچینلری دنجیگینده گیزلتدیم.
دان یئری سؤکولمه‌میشدی کی من
بولاق باشیندا
کندلی پالتارلاریمین
توْزونو سیلکه‌له‌دیم.
یودوم ال- اوٍزومو
گئیدیم کَلَشلریمی
اوزون بورون اوْتوبوس-
منی، بو جهنمده اندیردی.
آهای، ساچلاری گتیره‌لی اوْغلان،
گتیر کلشلریمی، ایستیرم گئدم.
دمیردن تیکدیگیم ائولر،
حیفاظلی پنجره‌لر،
پیلاستیکی گوٍللر
سیزین اوْلسون!
من کؤلگه‌لیکلر ایچینده‌کی کوزه‌دن
سو ایچمه‌گه-
کؤنلوم اسیر.
گتیر کلشلریمی، ایستیرم گئدم
پیلاستیکی قابلاردا ساخلانان
پاستوریزه سوٍد،
زر ورقه چولانان بیسکویت‌لر
سیزین اوْلسون!
من، آردی قارا پنیر چؤرگه،
ننه‌م یاپان فتیره،
قوْیونلار اَمجه‌گیندن سوٍزولن چیی سوٍده
یئریکلمه‌میشم.
سنین نه ایشین وار؟
قوْی “مالت ایستیتمه‌سی” منی بوْغسون!
گتیر کَلَشلریمی،
ایستیرم گئدم.
«والیوم» قورص‌لاری‌نین
یوخو نَئشه‌سی-
سیزین اوْلسون!
من، یوْرقونلوقدان
یوْنجالیقلار پانیندا
یوخلاماغا داریخمیشمام.
سنین نه ایشین وار؟
قوْی ایلان منی چالسین!
گتیر کَلَشلریمی،
ایستیرم گئدم.
بَزَکلی بوتیک‌لرده دوٍزولن عطیر اوْدکوْلونلار
سیزین اوْلسون!
من عطریم، اوْدکوْلونوم
شبدر چیچکلرینی درن
قیٌزلارین-
دؤشونده قالیب.
سنین نه ایشین وار؟
گتیر کَلَشلریمی،
ایستیرم گئدم.
آهای ساچلاری گتیره‌لی اوْغلان،
هاردا یوخلامیسان؟
گتیر کَلَشلریمی!