گون؟ اون دؤرد فوریه…
معصوم جبارپور
ایللر کئچیر
بیر کؤلگه آتیر یاشانتی‌یا
اوزاقلاشیر
بیر ماجال الده ائدنمیرم
ساچلاریم آغاریر
یاشامین سفالتلی قارشیسیندا دایانیب،
توپورم
یوخ
یئر کوره‌سی
هئچ زامان دوزنگه‌یی منیم نیفرتیمله دؤنمور!
کیرلی گون سایارلارین سویوقلوغو
قیشین گؤوده‌سین دلیک- دئشیک ائدیر
قیش اؤز سویوقلوغونا یئریکله‌ییر!
آمما
گون سایارلارین کیرلیلیغین بوش وئر
فوریه‌نین اون دؤردون اؤزله‌میشم …
بیر قارلی گئجه‌ده
باخیشلاریمیزی بیتوو تاپولاندیردیق
***
سن بیر گئجه چانتانی دولدوردون آنیلارلا
اوزاقلاشدین
یئنه قار
سنسیرلیک‌له دولو
خیاوانلاری بیر به بیر قاچدیم
باغمئشه_شاهگؤلو
اوجا بینالار منی آلای ائتدی
گئنیش کوچه‌لرینده_
بوش سئوگیلی‌لر اؤپوشرکن
آغلادیم
ندن یاناقلاریم ایسلاق؟
پالتارلاریم قورو سانکی گونش ساچیر ساچلاریما
سن کی باشیمیزا چتیر توتماییبسان!
تانیمادیغیم کوچه‌لر..
بیر قادین یامالی بیر چادرا ایله
پالتار آسدیقجا
بئلی بوکولموش بیر ارکه‌یی قارقاییردی
گئده‌سن گلمه‌یه‌سن!
یوخسا منده بو سؤزجوک‌لری دیله گتیردیم؟
یوخ
قافام قاریشیق
ندن سنی آنیمسایانمیرام؟
سندن باشقا
قارشیمدا تام بوی بیر رسیم
کیمسه‌لردن
بیر آنی گؤستریر
یئنه سنسیزلیک
ایلک باخیشدا
آرادیغین گؤزلر
قصورسوز باخیشلاریم اولدو
آمما
گئدینجه
گؤزلریمی بیر موردار اؤلویه چئویردین!
جییرلریم نفسلرینله دولو
توکنمه‌دن گل
سونوج یاخیندا
تانرینی قیدیقلاندیرما
گل
بیلیرسن می؟
آنلادیم
هر گئجه
بیر قیزجیغاز بکارتین سنه باغیشلاییر
سن
منیم خیال‌لاریملا
یئنیدن ارکک‌لشیرسن !
باخسانا
ساییقلاییرام
بو یازینین آخینی
او حوزونولو فعل‌له باشلا دی
گئدین!!!
ایندیسه من
داغینیق ساچلارلا
کی،
تبریزین آخشام یئلی ایله دانس ائدیرلر
چانتا دولو اسکی خاطیره‌لر‌له
ترن بئکله‌ییرم
پلتفورمون او بیری طرفیندن
باشقا بیر بوش ترن اوزاقلاشیر
ال ساللاییرام
بیر نئچه دیقه سونرا
آجی بیر داد جالانیر داماغیما
و بیر قیزجیغازین چانتاسی آغیز آچیب
آغلاییر
دوراق اوزاقلاشیر
قیزجیغاز
چانتا دولوسو خاطیره
یالنیز
بیر قوروموش ایکی اؤپوجوک قالیر کیرلی گون سایاردا
گون؟
اون دؤرد فوریه…
2 پاسخ
گؤزلریم اوسته …
lütfən yazıları bizim Azərbaycan latin alfabetində də yazın ki başqa türk və Azerbaycanlılar da oxuya bilsinlər tşkl لطفا مقالات خودتان را با آلفابت لاتین ترکی هم بنویسید که دیگر عزیزان ترک در آزربایجان و کشورهای ترک هم بتوانند بخوانند بت تشکر.