اولدوز…
خسرو باقرپور
چئویرن: ائلدار موغانلی
ترجمه: ائلدار موغانلی
ائلدار موغانلی
00:00
00:00

بهمنین اون‌دوققوزونا…

گؤروشونه گلدیم
نغمه‌ دولو چانتاملا
و اوره‌ک دولوسو یگانه سئوگیمله.
«اؤپوشون یاغیش دادیندایدی،
بوغازیندا سحر قوشو
اینسان کدرینین ناغیلینی اوخویوردو؛
باخیشی‌نین عصیان آتی
صبیرسیزجه‌سینه اوره‌ییمین چمنلیگینده چاپیردی.
غضب چؤلوندن اسدیکده هرزه کولک
اللرین، شقایق چتیری اولوردو
یونجا گولو، سنه وورولوردو!
گؤروشونون هیجانی
بوغدالیقلارین کال که‌کیلینی تیتره‌دیردی؛
گورولدادیقجا کین‌له دولو گورولتو
اورکموش گؤزلرینین درینلیگینده
آنا اضطرابی گؤرونوردو؛
نه‌ده گؤزل‌ایدی گؤزلرینین شفقتی!
بیر پاییز گئجه‌سینده
بولودون کؤلگه‌سی دوشدوکده رؤیا کؤکسونه
نیلوفرین سون بوداغینی
باخیشیمدان دردین
و گور آخیشلی چایی‌نین جوشغونلوغونا وئردین،
آیی
چییینیمین باشی اوستوندن قوپارتدین
و قارانقوشلارینین سفرینه باغیشلادین.»
بیر عؤمور خیالیمدا یاشاییبسان
منده ماهنی اوخویوبسان
خیالی‌نین قانیندا-
یویوبدور حسرت، ساچینی
و یارالاریندا آختاریبدیر اولدوز، غرورونو.
قیرخ بئش ایل کئچیب
و من ایندی
دفینه تاپینتیلاریملا
قورتارمیشام آغری توخونتولاریمدان!

خسرو باقرپور
اشتراک گذاری در print
چاپ
اوخوماق زامانی: < 1 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

اولدوز…

ائلدار موغانلی
www.ishiq.net

آذربایجان ادبیات و اینجه‌صنعت سایتی