اؤیود
مسعود آذر
ظن ائتمه کی سن یورولسان
حیات بیرآن دایاناجاق؛
یا قاییدارسان
اولو کاینات ترسینه فیرلانار.
سن سارالیب بوزارساندا گونش سؤنمییه‌جک،
اسکی قایداسیندان دؤنمییه‌جک.
باشینی چوخ توتما گؤیه!
آیاغینی اؤپمگه آی یئره ائنمییه‌جک.
من- من دئییب
نه دن اؤزونو قالدیریرسان گؤیه؟
سانیرسان‌می اذن وئرمه‌سن
سحر تئزدن گونش دوغماز؟
سن دنیزلر قارشیسیندا تکی دامجی‌سان،
بو دنیزله اولسان وارسان،
یوخسا
سن‌ده توز باسمیش کؤهنه بیر آدسان.
سن اولسان‌دا بو ترپه‌نیش وار حیاتدا، اولماساندا،
دایان، دایان!
گئری قاییت،
آیاق باسما بو یاریشا!
