کؤنول
احمد درگاهی
بیــرآز دینــله ســــؤزلریمی
توخـــوم اَکمه داشا کــؤنول!
سنـه دئییم ، هئـچ گؤیه‌رمَز
زحمت گئـــدر بــوشا کؤنول!
نــه شــــور یئره ، نــه کَله‌یه
نـــه سئله وئر ، نـــه کوله‌یه
محبتـــــــی اَک اوره‌یـــــه
قوی دیرچَلسین قوشا کؤنول!
عؤمور سوروب ،گونلر سایان
بـــــو غفلتدن آرتیــق اویان
آغیــــر اول داغ کیمیـن دایان
عؤمرو وئـرمه بــوشا کؤنول!
خیــــاللارلا یاشاییـــرسان
سحـــرآخشام آغلاییرسان
«درگاهی»یـه وقت آییرسان
من ده دئییم یـاشا کــؤنول!
