شعرلر(۱)
رقیه عبدیلی(سازاق)
(۱)
هرگون سیزدن قاییداندا
پولیسلر دک
اؤز اؤزومو یوخلاییرام؛
منده، سندن گلنلری
بیرجه- بیرجه آرایارکن
یاساقلاردان بیرآزینی
فیدانلارین چاناغیندا قویلاییرام؛
سیرتیلمیش بیر اوشاق کیمی
خیالینی خیالیمدان هویلاییرام؛
قورخا -قورخا
ایراق -ایراق
گوزگولنمیش باخیشلاردان
اوره‌یینی
اوره‌ییمده
ساخلاییرام.
(۲)
دوغولماق ایسته‌ییرم،
جراحلارا دئیین ده‌یمه‌سینلر
اللریمدن توتانمیرلارسا
ایاقلاریمدان توتوب چکمه‌سینلر!
سس‌سیز
آغریسیز
گلمکدنسه
اؤلمک یاخچیدی،
ایسته‌ییرم
فریادیملا
آغریلار دینجلسین.
(۳)
اوره‌یینی کوچه- کوچه گزدیر منی
ایتسم آختارما،
قوی قالیم اوره‌یی‌نین بازاریندا،
قوی آلیش- وئریشلرین منه آیدین اولسون،
قوی گلنلر، گئده‌نلر
تانیش اولسون،
منی گورسون !
خاطیره دفترینده یاز
واراق- واراق،
یاز آدیمی قوللاریندا
چکدیین قوللاردا یاز!
یاز آدیمی اوره‌یینده
من اؤلنده
قبیریم اوسته داش یئرینه
اوره‌یینی
یازیلمیش آدیم سانیم‌لا
یاتیت قالسین،
گلیب گئدنلر اوخوسون
سن منیمسن!
