مودئرن سئوگی
حیدر عبادی(باریش)
سنی
مودئرن دوشونورم
دوداقلارین قهوه قوخویور
گؤزلرینده دالغالانیر سؤزجوکلر
اوخویور
اللرین ساللانیر او تای خییاواندان
دیلیندن
آرابالار سیقنال چالیر
ساچلارینین ترافیکینده
گیجه‌لنمیش باخیشلاریم قالیر
سنی
مودئرن خاطیرلاییرام
شعرلریمده داها
جئیران یئریمیر یئریشلرین
آت بئلینده ساچلارینا
نسیم دولاشمیر
یئللره قیسقانمیرام
داها
اللرینین ریحان قوخوسونو ایتیرمیشم
شه‌هرین نم هاراسیندا
سنی
مودئرن آنلاییرام
چیراغلاری سؤنمه‌ین شه‌هرین
گئجه‌لرینده
توستودن سورمه‌لنن گؤزلرین
آغینا وورولورام
لاله‌لر سولوخوب
یاناقلاریندان ایراق
لاله‌لر رنگ
اولا بیلر..ده
سنی
مودئرن سئویرم
مرسدس آهلارینا اوزولورم
بنیزلریندن آخان پورشه‌لره
سانتافا صاندیغیندا
مئساژ گؤنده‌ریرم
بو محببته خییاوانلار قیسقانیر
کوچه‌لر یانیر
او تای یولدان ال ائدیرسن سئوگینی
من ایسه گولومسه‌ییرم سالامینی
گوشوندا آدیمی
نه سئیو ائله‌میسن قاداسی
هانسی نومرنده‌یم
بوش وئر اوزولمه
منی دوشون
مودئرنله‌شیریم
دوشونجه‌نی
سئوگینی
سنی …..
