دیلی چیینین‌ده آدام
کیان خیاو
منیمکی هیولا دئییل
بیر گؤیرچین قانادی‌دیر اوچورورام اؤزوم‌له
آغ قارقایا بنزه‌ین
له‌لک‌لری پرن-پرن تؤکولن آغزیم‌دا…
عاغلی گؤزون‌ده
گؤزو دیلین‌ده
دیلی چیینین‌ده یاشایان گؤردونوزمو بورا کیمی؟!.
بیری چیینین‌ده‌کینه آدام یئدیردی
من‌سه گؤزیاشیمی، اورک قانیمی
اوسته‌لیک بئلیمه چاتیلمیش یاشام یوکومو…
تاریخ منی یاخشی تانیییر
بونلا بئله هارداسا بیر رومان وارمی
ایچینده بیر کاراکتری منه بنزه‌ین؟!.
آجی‌لاردان یوغرولموش بیر کاراکتر
آلا توردان یارین آلا تورا کیمی
اوتانقاج، سوچ‌سوز ال‌لری، آیاق‌لارییلا
یالنیز، تک‌باشینا
قالابالیق‌دا…
او دؤرد یاشی یوخکن
چاتار-چاتماز قیرخ کیلویا آغیرلیغی
دؤرد مین کیلولوق بیر دیلین آلتیندا
دوشن قانلی هالایا؟!.
ائئئئی قوخوسو قورخو، بویاسی اؤلوم
ائئئئی آلاتور… آنا تور… آنا تورپاغیم!
ائئئئی جانیندان آییرا‌جاق جان‌لارینی
دیلیمی چیینیم‌ده دوغانیم منیم!..
خرداد آیی ۱۳۸۷
یک پاسخ
سایئن خیاو هیولا یئرینه خورتلان یادا خورتدان یازسایدینیز داها تورکجه اولوردو چونکو من هیولانین فارس کلمه سی اولدوغونو دوشونورم.و دئمک ایستریم کی سیز یازار یادا شاعیرلر کی بیر یازی یادا شعر یازیرسینیز گره ک آختاریب دوغرو تورک کلمه لری تاپاسینیز.