اینک‌لر قانمیرلار …
آراز آصف
اینک‌لر قانمیرلار قدم‌لر مبارک اولا بیلر
و حتی من سئوه بیله‌رم
سن سئویله بیلرسن
و بیز سئویشدیکدن سونرا نه موبارک اولا بیله‌ریک نه ده…. قالسین!
بایرامین اون بیری ایدی و نحس ایدی و یاغیشلی ایدی و آروزسوز، زادسیز
دوزو بوتون من وارایدی، آروز وارایدی
و سئرچه‌لردن داشیماقدان
یورغون یاغیشدان قاچارغی یاتمیشدیلار
سئرچه‌لر یانی
قوش سئرچه‌لری دئییره‌م
یانی یاغیش باهارا خیانت ائدیردی
یانی بولودلار گیزلینجه‌سینه، سنی اؤپوردولر
و قونشو اوغلان‌جیغازدا اؤیله
فروغ بارماقلارینی اونلارا اکیردی
سن اؤزون اکیلیردین
تورپاق خیانت چاناغی‌دیر قیز!
قهرمان‌پرور ده اولور، خایین ده
“خاییین قارانلیق گئجه‌لر” دئمیش حوجام…
سن‌سه یوخ…یوخ قده‌ر ایتیب باتدین و اوندان سونرا
نه بوتون من داریخدیق، نه آروز، نه سئرچه‌لر سنه.
ایلین اون بیرین دن قاباق ایدی یاتاغینی ساتدیغین
و بیر قارین چؤره‌ک زهیر کیمی قانینا جانینا ایشله‌ییردی
خیانت، دوشوندوک‌لرین و سیاست، ائتدیک‌لرین ایدی.
دونیا یالانچی آدامین یالاندان خیال ائتدییی
و خیالینی بوش وئردیییی بیر رومان دیر خانیم
آنجاق!
یالانلارا دوزو من‌ده اینانیرام
یالانلار آداملاری یونگولله‌دیر
اولسون بیر از
اولسون بیر آن
یا دا عؤمورلوک
من عؤمور بویو بیر یالان خیالا آلدانماغی دا سئویره‌م
آنجاق بو خیال اؤته‌سینده بیچاق اولمامالی‌دیر
آرخادان وورولان ضربه آدامی اؤلدورمورکی
آرخادان خیانت اؤلدورور
من اؤلدوم یالانچی آدامین خیالیندا
سن منیم بوربوجاغیمی گزنده دوشوندوم یالان‌لارینی
و ایللر اؤنجه وئردیییم سؤزون توپورجه‌یینی یالامادیم دا یونگولله‌شه‌سن دئیه
سونرا آغیر باشین هاوالاندی
هاوادا آت اؤلدو، ایت قالدی
ایت اؤلدو
آروزوم وای… آروزوم وای… آروزوم…
اؤلن موغان هاماریندا ایت کیشی‌نین بئلیندن گلن کوچوک‌ایدی
یونگولجه‌سینه اوزاندین و گئتدین
نه بوتون من، نه آروز ،نه ده سئرچه‌لر داریخمادیق سنه…
سانیرام ایندی اوتوروبسان تسبئح سالیرسان
هر گونه بیر گوناه
هر گوناها بیر گون ایتیریلدی آرامیزدا
آنجاق اسنه‌یه- اسنه‌یه قالدی او تسبئحده شاه
و کیشی‌لیک اؤترگی من اؤلوم کیمی‌لیک ده چورودو
و بیتدی سن بیتن کیمی
گوناه بیتیب ایتن‌لرده اولور
گوناه شئیطانین سنه وئردییی و ماراغینی اویناتدیغی ماتاه ایدی
ماتاهینا کسیلدی باشیم.
سونرا دیریلدیم بیر اینسانین سیزیف افسانه‌سینده و یازیرام بونلاری
آداملار گئدیب گلمکده‌دیلر
گئدن‌لر آرخاسیز اولورلار، گلن‌لر عزیز
ائویمه تزه سولطانین تزه آددیمی دوشرلی اولوب
مبارک اولا بیلن قدم‌لردیر بونلار
اینک‌لر نه بیلسین آخی؟
شئیطان لچک‌لری سیلینیب اؤنجه
سونرا هاوا قارلی بیر آخشام اوستو
سنی سئویرم کیمی بیر شارکی دینله‌میشم
سونرا یازین اوغلان چاغیندا آراز بالاملا اوینایاجاغیمیز اویونا دوشونموشم
من بؤیله خوشبختم دئسم
سن شاشیریب قالاجاقسان
آنجاق قالما، شاشیرسان دا گئت
بیر داها گلمه کیمی گئت
بیل کی هئچ واخت
داریخمادیق بوتون نه من، نه آروز، نه ده سئرچه‌لر
دیمدیک‌لری زیتونلو اولمور سئرچه‌لرین
اونلار گؤیرچین‌لردیلر
باشی کسیک قوشلارکیمی
ساده‌جه یاغیش قورخوسوندان گیزلنمیشدیلر
گیزلین اولساق بئله
اصلینده آرمیزدا زیتون بئله بیر ایش گؤره بیلمزدی.
گؤرولمه‌ین شهره بلدچی لازیمدی
سنده گؤرولمز چوخ شئی‌لر واردی
اووجونو اوخودوم و بیلدیم بارماقلارین بئله مردار آدامین میندار جانینا اوخشاییردی
سنه فاتحه….
* آروز = قازان خانین خاییین قارداشینین آدی
