گولوشلرینی قورو !
سحر خیاو

گولوشلرین گونه باخان تارلالاری‌نین گؤزللیگی؛
گولوشلرینی قورو خاتون!
قوی یالنیز گونشه قوورولسون گولوشلرین؛
اینانما بو بوینو بوکوک دایانان قوش‌قووانا
قارقالارلا ال- بیردی بو تولکو کیشی!
قاپ- قارا قارقالار دنله‌یرلر گولوشلرینی.
تؤر- تؤکونتوسون‌ده
کور سیچانلار، قانادلی قاریشقالار اوغورلایار،
دووشانلار گمیرر،
باغالار خیمیر- خیمیر چئینه‌یر،
میندار میلچک‌لر پای گؤتورر گولوشلریندن.

خزل اولار؛
قارا یئللر آپارار؛
تارلامیز تالان اولار
گونه باخانسیز قالار!
آماندی خاتون-
قورو گولوشلرینی!!!