گونش قیزی تاق- تاق باشماق ایسته‌دی
سئوه- سئوه گئییب قاشماق ایسته‌دی
یوخسول ایدی آتا، آلا بیلمیردی
آتانین حسرتی دیله گلمیردی
هئی بو گونه، هئی صاباحا سالاردی
وعده‌لری بیر بیر اوسته قالاردی
گونش قیزی وعده‌دن شاد اولاردی
آنجاق آنا ماجرانی بیلردی
پرده چکیب دردینی گیزلدردی
گؤز یاشینی دالدالانیب سیلردی
گؤزو ساتاشدیقدا تاق- تاق باشماغا
گونش قیزی مئیل ائدردی قاشماغا
حسرتله باخاردی آتا قیزینا
یاناردی یوخسوللوق سالمیش اودونا
بیر گون سؤیله‌دی کی، «اولار آی قیزیم
بیر تاق- تاق باشماغی تیکم من اؤزوم؟
آخی، یوخدی چارام یول‌لار باغلیدی
کؤنلوم دومانلیدی، قلبیم داغلیدی
یوخسوللوق دیواری اوجادی اوجا
بازارین یوللاری باجادی باجا
نئیله‌ییم دیواردان گئچه بیلمیرم
بو باغلی قاپینی آچا بیلمیرم
بو تاق- تاق باشماغی قوی اؤزوم تیکیم
سن گؤزه‌ل قیزیمین نازینی چکیم»