اوزونو گؤرمه‌میشم کی!
ستار گل‌محمدی
ایللردیر وصلینه جان آتسام دا من
هله هئچ اوزونو گؤرمه‌میشم کی!
درمان اوچون هیجران ووران یاراما
باغیندان بیر چیچک درمه‌میشم کی!
فیرقتیندن دردیم چاتیب یوز یوزه
قویما منی حسرتینده غم اوزه
قارداش دئیه بیر دایانیب اوز اوزه
قولومو بوینونا هؤرمه‌میشم کی!
آهیم توتار اؤتن عؤمرون جهدینی
عاشیق اولان اونودارمی عهدینی
دوداغیملا ووصال دملی شهدینی
شکر دوداغیندان سورمامیشام کی!
«ستار» دؤزر قیش قهرینه یاز کیمی
چاغلار عشقین سینه‌م اوسته ساز کیمی
هله بو سینه‌می پای‌انداز کیمی
گلن یوللارینا سرمه‌میشم کی!
