گونه باخان
حسن ایلدیریم
دمیرپنجره لره قاپادی گؤزلرینی
جانیندا، گؤیلر آچیلدی
یاغیش لارین سئوینجی – گؤی قورشاغیناگولومسه‌ین
باغلار، تارلالار، بوستانلار کیمی،
سئوینج یاشلاریندان ساچیلان گولوشلره گولدو ایچی.
گؤیلر ماوی
آغاجلار یاشیل
زمی‌لرساری
و
گؤزلر قارا
ایچینده بوی آتدی ایستک‌لر، آرزولار، اومیدلر
بیر اوچوملوق ماویلی‌یه بوکولموش
قارا گؤزلرین حسرت آلووندا آلیشدی
یاشیل یوموشاقلیغا ساریلان بیر اسیملیک نسیم
قاراگؤزلونون یانان کؤنلونده اسدی!
ایچینده
گؤیردی، گوللندی، سونبوللندی فیدانلار، سونبوللر، تاغلار
ایچینده دوغدو آی، ساچدی اولدوزلار
دورولدو، یونگوللشدی
بولاق لارین شووقو یاییلدی جانینا
گؤزلرینده اوفوقلر آغاردی، شفقلندی
جانینی ساردی، باخیشلار، قوش سس‌لری، یئمیش‌لرین عطری
قارا گؤزلرده آچیلان سحر
ماوی گؤیلرده ساری گونش
و
گونشله اوزون- اوزادی اویونا گیرمیش
اوجا بویلو
گونه باخان!
۱۳۹۰ تهران
