سرخوشلوق
محمد نوری
سرخوشدوم
دویمادیم اللرینین توخوندوغونو
ایکی بویوتلو شوشه‌لردن
خییابان کئچیر ایماژلارا
ساری تاکسی‌لری ساخلادیب دؤندرین‌می بو سطیرلره؟
چوخ واخت لار سرخوشلوغومو
اویانمادی اوتاق
او-یانمادی!
بو دا یاندی!
-دایان
-دایان
دئییب ال ساخلادیرسان خییابانین جیزگی‌لرین
دویمادیم موغان‌می آلیشیر!
یوخسا یانقین سونبول‌لرین گون باتارینا یاتیر ساچلارین!
بیلیرمی سن؟
دوداقلارین
قیرمیزی تون‌لاریندا
خییابان‌لارین اینقلاب مدنییتی‌دیر؛
اؤپ منی
زاوالی نسنه‌لریم
نئون فوندوندا کاغیذلاری خییابانا چئویرسین
سرخوشدوم
دویمادیم!
سن هانسی گون‌لرین لچیینی بولودلارا
پای وئریب
پاییزی پایلاشدین باغچامیزدا
هر نه‌دن اؤنجه پنجره‌نی آچمالییام
بیر قوجاق پرده اسم
دایانسین سطیرلر
اویانسین اوتاق.
